«Այլ կերպ» բարդ հավելված. սեղանի թիմային ինտելեկտուալ խաղ

Խելահեղ ժամանց՝ հայերենի գիտակների համար:

Բարդ հավելվածը ԱՅԼ ԿԵՐՊ խաղի լրացուցիչ քարտերի հավաքածու է՝ համալրված հայերեն խրթին բառերով ու նոր անուններով։ 

Անհրաժեշտ է թիմակիցներին բացատրել քարտերի վրա գրված բառերն այլ կերպ՝ չօգտագործելով նույնարմատ բառեր կամ թարգմանություններ: Առաջադրանքը կատարելու համար տրվում է 1 րոպե, որը հաշվվում է խաղին կից ավազի ժամացույցի միջոցով։

Պարգևում է աննկարագրելի աշխույժ ժամանց, խթանեում հայերենի գործածությունն առօրյա ժամանցում և նպաստում հայերեն բառապաշարի զարգացմանը:

Որտե՞ղ խաղալ

Հավաքույթներին, տանը, ակումբում կամ ճամփորդելիս:

Ու՞մ հետ խաղալ

Ընկերների, գործընկերների, ընտանիքի անդամների, համադասարանցիների … Նույնիսկ կազմակերպել սերունդների միջև «ինտելեկտուալ պայքար»։

Մասնակիցների նվազագույն թիվը՝ 4, առավելագույնը՝ անսահմանափակ։

Անունն ու կարգախոսը՝ «Այլ կերպ». խաղում ենք հայերեն:

Տուփի պարունակությունը`

▪       120 քարտ

▪       խաղի կանոնները մեկնաբանող թերթիկ

«Այլ կերպ» խաղի ստեղծման հիմքն ու շարժառիթը անբասիր հայերենի գործածության խթանումն էր:

Խաղի բովանդակությունն առանձնակի հոգածությամբ է մշակվել: Ընտրվել են մեր պատմության, մշակույթի ու կրոնի հետ առնչվող բառեր ու արտահայտություններ, ոսկեղենիկ հայերենի գեղեցիկ բառեր, որոնք ինչ-ինչ պատճառներով դուրս են մղվում առօրյա գործածությունից կամ փոխարինվում են օտար թարգամանություններով:

Յուրաքանչյուր քարտի վրա գրված յոթ բառերը որոշակի օրինաչափություն ունեն. ընդգրկված են պարզ և բարդ գոյականներ, բայեր, բառակապակցություններ, հատուկ անուններ, տեղանուններ, ինչպես նաև մեր պատմության, մշակույթի ու կրոնի հետ առնչվող բառեր ու բառակապակցություններ:

Ստեղծվել է 2014 թվականի դեկտեմբերին:

Արտադրված է Հայաստանում

Արտադրող՝ ԱՅԼԿԵՐՊ ՍՊԸ

Բաժանվում ենք թիմերի, չինգաչունգով կամ ոտք գցելով որոշում՝ ով է սկսում խաղը: Թիմից մեկը քաշում է քարտը և փորձում իր թիմակիցներին բացատրել քարտի վրա գրված բառերը՝ այլ կերպ: Առաջադրանքը կատարելու համար տրվում է 1 րոպե, որը հաշվվում է խաղին կից ավազի ժամացույցի միջոցով: Յուրաքանչյուր գուշակած բառը 1 միավոր է:

Եթե քարտի բոլոր 7 բառերը գուշակել են, իսկ ժամանակը դեռ չի սպառվել, մասնակիցն իրավունք ունի հաջորդ քարտը վերցնել:

Բառերը կարող են բացատրվել տարբեր եղանակներով, օրինակ՝ օգտագործելով հոմանիշներ, հականիշներ, նկարագրել իրավիճակ և այլն:

Քանի դեռ թիմակիցները փորձում են գուշակել, բացատրողը պետք է ընթացքում շարունակի նորանոր հուշումներ տալ՝ պահպանելով խաղի կանոնները:

Բացատրելիս քարտի վրա գրված բառերի հերթականությունը պահպանելը պարտադիր չէ:

Հակառակորդ թիմից որևէ մեկը պետք է հետևի, որպեսզի բացատրողը պահպանի բոլոր կանոնները: Խախտելու դեպքում (օրինակ՝ բառարմատն օգտագործելիս կամ թարգմանությունը նշելիս) թիմը կորցնում է մեկ միավոր

Հաղթում է այն թիմը, որը կհավաքի ավելի շատ միավոր:

Բացատրելու նրբությունները. կարելի է, չի՛ կարելի

Կարելի է.

• Օգտագործել հոմանիշներ, հականիշներ, նկարագրել իրավիճակ
• Բառակապակցությունների դեպքում կարելի է հուշել որ 2 բառից է բաղկացած:
• Եթե մասնակիցներն արդեն իսկ գուշակել են բառերից մեկը, բացատրողը կարող է արդեն բացատրելիս կիրառել այդ բառը:

Չի՛ կարելի.

• Մատնացույց անել, կամ հուշել այն, ինչ կարելի է տեսնել այդ պահին. Օրինակ, իմ դեմքին կա (ակնոց), կամ, հեռախոսիս մոդելը (այն դեպքում, երբ հեռախոսը սեղանին դրված է):
• Օգտագործել բառարմատը
• Օգտագործել թարգմանությունը, նույնիսկ եթե հատուկ անուն է. Օրինակ, Միկկի Մաուս բացատրելիս չի կարելի ասել ՄՈՒԿ:
• Հատուկ անունների դեպքում չի կարելի հուշել մեկ այլ մարդու կամ մեկ այլ նշանակություն ունեցող, բայց միեւնույն հնչողությունն ունեցող հատուկ անունով. Օրինակ, Սթիվ Ջոբս բացատրելիս չի կարելի ասել Սթիվ Վոզնյակ-ի գործընկերը:
• Չի կարելի բացատրել տառ առ տառ
• Չի կարելի նշել տառերի քանակը բառի մեջ
• Չի կարելի հուշել հոդակապով. Օրինակ, ՍԵՂԱՆԱՏՈՒՆ բացատրելի, եթե մասնակիցները գուշակել են ՍԵՂԱՆ- հատվածը, բացատրողը չի կարողա ասել սեղանԱ-ինչ / Ա-ն այս դեպքում հոդակապն է /
• Եթե բառն անծանոթ է, կամ դժվար է ըստ իմաստի բացատրել, կարելի է բացատրել բառարմատներն առանձին-առանձին. այսպես օրինակ, ակնախնձոր բացատրեք ակն արմատը որպես աչք, խնձորը, որպես միրգ: Մնում է միավորել այդ երկուսը, եւ կստանաք քարտի վրա գրված բառը: Բայց բացատրողը չի կարող հուշել հոդակապը, կարող է ասել - այդ երկու բառը միավորիր:

Խաղի կանոնները մեկնաբանող թերթիկը, այստեղ (pdf):