«Այլկերպիկ» սեղանի թիմային ինտելեկտուալ խաղ

«ԱՅԼԿԵՐՊԻԿ»-ը սեղանի թիմային ինտելեկտուալ խաղ է՝ երեխաների ու պատանիների համար:
Գունեղ, վառ ու  նկարազարդ բովանդակությամբ այս խաղը բաղկացած է 200 երկկողմանի քարտերից՝ նկարներով և բառերով: Նկարներով կողմը նախատեսված է 4-8 տարեկան երեխաների համար, իսկ բառերով կողմը՝ 8-14:

Անհրաժեշտ է թիմակիցներին բացատրել քարտերի վրա պատկերված նկարները կամ բառերը այլ կերպ՝ չօգտագործելով նույնարմատ բառեր կամ թարգմանություններ և մատնացույց չանելով տվյալ իրը: Առաջադրանքը կատարելու համար տրվում է 1 րոպե, որը հաշվվում է խաղին կից ավազի ժամացույցի միջոցով:
ԱՅԼԿԵՐՊԻԿ-ը նաև ուսուցողական է. զարգացնում է երեխաների տրամաբանությունը, երևակայությունն ու մտքի ճկունությունը, հղկում է բանավոր խոսքն ու հաղորդակցման ունակությունները, խթանում հայերենի գործածությունը առօրյա ժամանցում:

Մասնակիցների թվի սահմանափակում չունի. կարող է զվարճալի դարձնել ցանկացած մանկական հավաքույթ և միաժամանակ ուսուցողական ժամանց ապահովել դպրոցներում՝ մի ամբողջ դասարանի համար:

Անունն ու կարգախոսը՝

«ԱՅԼԿԵՐՊԻԿ». խաղում ենք հայերեն:

 Տուփի պարունակությունը`

• 200 երկկողմանի քարտ (400 նկար և 800 բառ),

• 1 ավազի ժամացույց,

• խաղի կանոնները մեկնաբանող թերթիկ,

• 1 նոթատետր (հաշիվը գրանցելու համար):

ԱՅԼԿԵՐՊԻԿԸ ստեղծվել է, որպես ԱՅԼ ԿԵՐՊ խաղի մանկական տարբերակ:
Ուստի խաղի բառերն ու նկարները մշակվել են հաշվի առնելով երեխաների հոգեբանությունն ու նախասիրությունները: Արդյունքում՝ խաղի բովանդակությունը հետաքրքիր է, գրավիչ և միաժամանակ ուսուցողական երեխաների համար:

Երաշխավորված է ԿԳՆ Լեզվի պետական տեսչության կողմից:
ՀՀ ԿԳՆ Կրթության ազգային ինստիտուտի կողմից որակվել է որպես հայերենի իմացությունը խթանող օժանդակ նյութ:

Ստեղծվել է 2016 թվականին:
Արտադրված է Հայաստանում:
Արտադրող՝ ԱՅԼԿԵՐՊ ՍՊԸ:

Բաժանվում ենք թիմերի, չինգաչունգով կամ ոտք գցելով որոշում՝ ով է սկսում խաղը: Թիմից մեկը քաշում է քարտը և փորձում թիմակիցներին բացատրել քարտերի վրա պատկերված նկարները կամ գրված բառերը այլ կերպ՝ չօգտագործելով նույնարմատ բառեր, թարգմանություններ կամ տվյալ իրը՝ մատնացույց չանելով:
Կարելի է բացատրել հոմանիշների, հականիշների, ասոցիացիաների միջոցով. փոքրիկներին թույլատրվում է որոշ լրացուցիցիչ հուշումներ օգտագործել՝ ժեստեր, դիմախաղ և ձայներ:
Օրինակ եթե «շուն» է, կարող է համապատասխան ձայն հանել, բայց եթե մոտակայքում շուն կա, չի՛ կարող մատնացույց անել:

Առաջադրանքը կատարելու համար տրվում է 1 րոպե, որը հաշվվում է խաղին կից ավազի ժամացույցի միջոցով:
Եթե քարտի բոլոր 2 պատկերը կամ 4 բառը գուշակել են, իսկ ժամանակը դեռ չի սպառվել, մասնակիցն իրավունք ունի հաջորդ քարտը վերցնել:
Յուրաքանչյուր գուշակած բառը կամ պատկերը 1 միավոր է:
Հաղթում է այն թիմը, որը կհավաքի ավելի շատ միավոր:
  
 Խաղի կանոնները մեկնաբանող թերթիկը՝ այստեղ (pdf):